மறுபடியும் ஒரு ஜனனம்

மரணம் நோக்கிய
எனது தேடல்களின் போதெல்லாம்
புதிதாய் ஓரு ஜனனம் தேவைப்படுகிறது

கடந்துவிட்ட இறந்தகாலத்தின் கதவை
மறுபடியும் திறந்து
வாழமுடியாது விட்டுப்போன வாழ்க்கையை
மறுபடியும் வாழ்ந்துபார்க்க
கிடைக்கலாம் மீண்டும் ஒரு ஜனனம்

நிறைவேறாத ஆசைகளுடன் இறந்து
ஆவியாய் அலைவதிலெல்லாம்
இஸ்டமில்லை எனக்கு

நீண்ட தேடல்களில்
விடுபட்டுப்போனவற்றையெல்லாம்
ஒரு பட்டியலிட்டு
கதை
திரைக்கதை
வசனம்
இயக்கம்
எல்லாம் போட்டபின்
நெருங்கலாம் என்னை மரணம்

மரணம் நோக்கிய
எனது தேடல்களின்போதெல்லாம்
புதிதாய் ஒரு ஜனனம் தேவைப்படுகிறது

ஸ் ரீபன்